Larunbatean amaitu zen Igoera Herrikoien Liga, Elantxoben. 1,3 kilometro eta 220 metroko desnibela zuten aurretik korrikalariek. Zorua, gainera, bustia zegoen. Parte hartzaileak bata bestearengandik minutu batera atera ziren, portutik herriaren goiko alderainoko erlojupeko saioa egitera. Emakumeetan errekorra berdindu zuen Oihana Zubillagak. Anoetarraren ondoren, Igoera Herrikoien Ligan sendotasuna erakutsi duen Irati Zabala iritsi zen, 10 minutu eta 52 segundoko denborarekin.
Gizonezkoetan, Ibon Badiola izan zen azkarrena, probako errekorra eginaz, gainera. Badiolak ibilbidea osatzeko 7 minutu eta 17 segundo behar izan zituen. Bigarrena eskualdeko ordezkari bat izan zen, Oier Zubeldia. Amezketarrak garaipena gertu izan zuen, baina irabazleak baino 15 segundo gehiagotan egin zuen igoera.