Dantza eta praktika garaikideak udalerri txikietara eramatea helburu duen LABO GEO ekimena abenduaren 12tik 14ra izango da, Alkizan eta Larraulen. Iaz Larraulen ere egin zuten, eta Alkizara estreinakoz iritsiko da. Programak tailerrak eta dantza ikuskizunak aurreikusten ditu.
Egitasmoaren helburua da dantza eta praktika garaikideak Gipuzkoako udalerri txikietara eramatea. Izan ere, ohikoa da arte garaikidea hirietan ikusi ahal izatea, baina ez landa eremuetan, eta horregatik sortu zuten LABO GEO proiektua. Espazio berriak sortu eta publiko berrietara iritsi nahi dute, «ingurunearekin eta komunitatearekin bat eginez».
Hala, antolatzaileek azaldu dutenez, jarduera berritzaileetan zein tradizionaletan oinarritutako ekitaldiak eramango dituzte eskualdeko bi herrietara. Batetik, hiru dantza konpainiak prestatutako hiru pieza ikusi ahal izango dira, eta bestetik, guztiz irekiak izango diren tailerrak.
Egitaraua
Larraul
- Abenduaren 12an, 17:00etan tailerra egingo dute Marina Eskisabel irakaslearekin.
- Abenduaren 13an, 12:00etan, hiru ikuskizun egongo dira: Aldaketa dantza konpainiaren Kapsula 0.1, Komorebi Produkzioaken Zuloa, eta Neskenaren Badoa.
Alkiza
- Abenduaren 13an, 17:00etan tailerra egingo dute Borja Bordonabe irakaslearekin.
- Abenduaren 14an, 12:00etan hiru ikuskizun egongo dira: Irene Naranjoren Jaranda, Amaia Elizaranen Iraun eta NODE konpainiaren Basandere.