Buru-belarri lanean ibili dira Tolosan Herrikideko eta AE Damiao De Goes Portugalgo ikastetxeko ikasleak. Guztion artean identitate kulturala, honen garrantzia eta aldakortasuna, musika eta dantzan oinarritzen den gure euskal kultura eta kultura ezberdinen lanketa eta sentsibilizazioa ardatz hartuta, hainbat ekintza egin dituzte: Tolosako ondare kulturala, euskal musika, musika tresna ezberdinen historia Soinueneako bisitan, euskal dantzak, Donostiako argazki rallya… Hau guztia frantsesez eta ingelesez kulturen arteko ezberdintasunetatik ikasiz.
Bai Tolosan eta baita martxoan Portugalko Alenquer herrian izango duten esperientziak guztiz aberasgarriak direla esan dute, «ikasleak hezteko eta pertsona bezala hazteko balio izango duena». Job Shadowing programa, ikastetxeen proiektu zehatzen bat edota hezkuntza proiektuez ikasteko bisitak egiteko Erasmus+ programak ahalbidetzen duen baliabidea da. Kasu honetan BIZI proiektuaren nondik norakoak ikusi eta ikastera Hungariako bi irakasle eta Portugalgo bat etorri direla esan dute.
BIZIn, astean 13 orduz eta ko-irakaskuntzaren bidez, ikasleek eremuka antolatutako proiektu interdiziplinarren bidez ikasgai ezberdinen eduki eta konpetentzi espezifikoak garatzen dituzte. «Guztiontzako kulturarteko aste guztiz aberatsa izan da, bizipenetatik ikasiz aritu direlako».