Azaroaren 25eko programaren barruan, urteroko hitzordua izan dute Saiaz Mankomunitateko indarkeria matxistaren aurkako protokoloari jarraipena egiteko. Bertan izan dira talde eragileko kideak, herrietako emakume taldeetako partaideak eta ordezkari politikoak.
Bilkuran jasotako datuak landuta, herrietako egoera zein den aztertu dute, eta Emakumeen Aurkako Indarkeriaren Kontrako egunaren harira, programa bateratua adostu dute guztien artean.
Artatutako kasuak
Aurten Bidania-Goiazko udal liburutegian elkartu dira, eta azaldu dute 35 urtetik beherako zenbait emakume artatu dituztela, zeinak indarkeria psikologikoa jasan izanaren zantzuak azaldu dituzten. Arduradunek zehaztu dute «kontrola edo jarraipena» antzeman dutela batik bat, eta askotan mugikorraren bitartez jasan dutela.
Aipatutako emakume horiek gizarte-zerbitzuetara edo medikura jo dute egoeraren berri emateko; Ertzaintzak, ordea, ez du erregistratu indarkeria matxisten inguruko salaketarik mankomunitateko lau herrietan (Albiztur, Beizama, Bidania-Goiatz eta Errezil).