Euskal musikari askok kaleratu dituzte lan berriak. Gertuenetik hasita, Monsieur LeCrêpek Venta Aundi diskoa kaleratu du, zazpi piezaz osatutako LPa.
Andoaindik datozkigu Gailu taldekoak eta haiek Bizi eta ixo disko berria kaleratu zuten irailean. Goierrin, berriz, Altzagaraten du jatorria Ianire Aranzabek eta Esanezin taldearekin oraintxe kaleratu du Hormetan idazten diskoa. Zumarragatik dator Uxue Kerejeta eta bere bakarkako lehen lana atera du duela gutxi: Amaiera.
Nafarroatik, aldiz, Gorka Urbizuk Londresko Abbey Road estudio mitikoetan uztailean grabatutako bi kantu eman ditu Bakan II disko laburrean. Eta Iruñerritik Naxker taldekoak lan berria kaleratu dute uda ondoren, Nori jarriko dizkiozu gure abestiak? izenekoa. Chill Mafian ezagututako Kiliki Frexkok ere, bakarkako ibilbidea hasteko Iltze 1 zazpi pistaz osatutako albuma atera du.
Horiek eta aleka-aleka kaleratu diren beste hainbat kanturekin osatu dugu ordubeteko jarduna.