Jokin Altunak ez du jokatuko Lau eta Erdiko Txapelketaren final-laurdenetako ligaxkaren hirugarren jardunaldiko partida. Aspe Pelota enpresak EPELi jakinarazi dio pilotari amezketarrak tendinopatia muskularra duela, eta, beraz, enpresa horretako zerbitzu medikoen iritziz, «ez dago asteburu honetan jokatzeko moduan». Altunak Zabalaren aurka jokatu behar zuen, larunbatean, Tolosako Beotibar pilotalekuan. Txapelketaren arauen arabera, Zabalak 22-0 irabazitzat izango du partida hori, eta, beraz, finalerdietara sailkatuko da A multzoko lehenengo postuan. Altuna III.a ere finalerdietara pasako da, taldeko bigarren postuan.
A multzoan dauden beste bi pilotariak, Jon Ander Peña tolosarra eta Bakaikoa, aukerarik gabe geratu dira finalerdietara igarotzeko. Beraien arteko partida igandean izango da, Bizkaia frontoian, baina ez du garrantzirik izango bertako emaitzak txapelketarako.
Tolosako jaialdia
Larunbateko Altuna III.aren eta Zabalaren arteko partida bertan behera utzi ondoren, Tolosako Beotibar pilotalekuko jaialdiari hasiera Artola-Iztueta eta Elordi-Martijaren arteko partidak emango dio. Ondoren Lau eta Erdiko Txapelketako Serie Bko norgehiagoka jokatuko dute Egiguren V.ak eta Amianok. Jaialdia 17:30ean hasiko da.