Lokiz mendikatean izan dira jokoan Basajaun Trail Race probak, eta eskualdeko mendi lasterkariak aurreneko postuetan iritsi dira. 43 kilometroko proban, Asier Ayerza tolosarra eta Noelia Lataburu irurarra izan dira irabazleak. Ayerzak 4.09.35eko denbora eginda lortu zuen garaipena, bigarren izan zen Asier Muruari 1.46ko tartea atereaz. Hirugarren Aritz Sardina (4.22.42) izan zen. Lataburuk 5.24.59ko denbora egin zuen garaipena lortzeko, eta dezenteko abantaila atera zion bigarren egin zuen Edurne Gil (6.03.36) korrikalariari. Hirugarren Beatriz Martinez (6.17.33) izan zen.
Proba ertainean, 23 kilometrokoan, eskualdeko presentzia izan zen emakumezkoetan. Soronea Ammma taldeko Itziar Oteiza izan zen irabazlea, 2.17.45eko denbora eginez, eta bigarrena Alpino Uzturre taldeko Yashira Navas tolosarra izan zen, 2.27.26ko denborarekin. Hirugarrena Elixabete Agirre izan zen (2.30.06).