Ondarearen Europako Jardunaldiak egiten ari dira azkeneko asteotan Gipuzkoan. 80 jarduera baino gehiago antolatu dira, aurten, ondare arkitektonikoa ardatz hartuta. Egunotan, hirietako monumentu handietatik landa eremuko herri eraikinetaraino, arkitekturaren lorpen artistiko eta teknikoak erakutsiko dituzte.
Gaur goizean, adibidez, Alkizan bi bisita komentatu egin dituzte. 10:00etan Alkizako eliza: memoria kolektiboa eta historia eraikin batean izenekoa egin dute, eta Pepe Aranzabe herritarra aritu da bertan azalpenak ematen. 11:00etan, berriz, Lete baserria ezagutzeko aukera izan dute bertaratutakoek.
Gaur, bestalde, Villabonan, Hormaren aurretik trazua tailerra egin dute Mirari Errondosororen eskutik, Kimuri espazioan.
Bihar, berriz, Topic, txotxongiloak eta arkitektura tailerra egingo dute Tolosan eta urrian eta azaroan zehar ondare industrialaren eraikuntza mapak eta planoak izango dira ikusgai Gipuzkoako Artxibo Orokorreko webgunean.
Urtero bezala, Gipuzkoako Foru Aldundiak Ondarearen Europako Jardunaldien edizio hau antolatu du, Europako Kontseiluak sustatuta eta Europar Batasunarekin lankidetzan. Ondare kulturari buruzko sentsibilizazioan sakontzeko antolatu dituzte ekitaldiak, erakunde ugariren parte hartzearekin.