53 urteko emakume bat hil zuten atzo, Zarautzen. Ertzaintzak 47 urteko gizonezko bat atxilotu du, eta giza hilketa egotzi dio. Emakumeen kontrako indarkeria salatzeko elkarretaratzeak egingo dituzte gaur, asanblada feministek deituta. Berastegin 19:45ean elkartuko dira plazan, Anoetan ere plazan mobilizatuko dira 19:00etan, Tolosan 19:00etan Trianguloa plazan egingo dute elkarretaratzea, eta Villabona eta Zizurkilen 19:00etan elkartuko dira oinezkoen zubian. Iruran,astelehenean egingo dute protesta, urriaren 20an, 19:00etan plazan.
Tolosako Udalak Tolosako Asanblada Feministak deitutako mobilizazioarekin bat egin du, eta herritarrei bertan parte hartzeko deia egin die. Era berean, erailketa matxista gaitzetsi du, eta familiarekiko eta gertukoekiko elkartasuna adierazi du. Halaber, Tolosako Udalak, herriko mugimendu feministarekin eta eragile sozialekin elkarlanean, indarkeria matxista desagerrarazteko borrokan jarraituko duela esan du, indarkeria matxistarik gabeko herri baterantz aurrera egiteko programak eta zerbitzuak ezarriz. Gisa honetako erasoen aurrean, zero tolerantzia adierazi nahi du udalak.