Donostiako Maratoi Erdian Iraitz Arrospide billabonatarrak bigarren postua lortu zuen (1.06.22), irabazlea izan zen Artur Bossyrengandik segundo bakarrera. Hirugarren Unai Arroyo tolosarra izan zen, 1.06.50eko denborarekin.
Nerea Murua altzotarrak Orreaga-Zubiri Maratoi Erdia irabazi zuen, 1.28.00ko denbora egin eta gero. Lehenengo aldia zen Muruarentzat distantzia horretan eta asfaltotik kanpo, eta 2014an Laura Solak egin zuen markatik oso gertu geratu zen, 27 segundotara bakarrik. Altzotarrak bigarrenari, Angela Iglesiasi, 3.34ko aldea atera zion, eta hirugarrenari, Ana Perez de Cirizari, 8.07ko aldea.
Bestalde, Asier Mujika ibartarra izan da Legorretako VIII. Lasterketa Solidarioaren irabazlea, 23.32ko denborarekin. Bigarrenari, Juan Garikanori, hiru segundoko tartea atera zion, eta hirugarrenari, Jon Unzuetari, hamabi segundokoa.