Meza nagusiarekin abiatu dute gaur San Migel Eguna, Iruran. Herritarrak elizatik irten direnerako zain zituzten herriko txistulariak, eta horiekin zeharkatu dute plaza udaletxeko atariraino. Herritar ugari elkartu dira bertan, haur zein heldu, eta ohi moduan, herriko dantzari batek Agurra dantzatu dio udal korporazioari. Lanak amaituta, hamaiketako herrikoia egin dute plazan.
Arratsaldean ere izango da zertaz gozatu Iruran. Herri kirol saioa izango da ikusgai, 17:00etan, plazan. Bertan erakustaldia eskainiko dute Lierni Osa eta Odei Izeta harri jasotzaileek, eta aizkoran, Jakes Izeta eta Jon Zaldua elkarrekin ariko dira Jesus Mari Mujikaren aurka. Horren ostean, bertso saioa egingo dute, 19:30etan, elizan. Bertan Aitor Mendiluze, Alaia Martin, Jesus Mari Irazu eta Maialen Lujanbio bertsolariak izango dira, eta Amaia Agirre ariko da gai jartzaile.
AZKEN FESTA EGUNA ALDABAN
Aldaban, berriz, festetako azken eguna izan dute gaur. Meza nagusiarekin abiatu dute San Migel Eguna, eta horren ostean, erretirodunen hamaiketakoa egin dute pilotalekuan. Bi mahaien bueltan bildu dira auzotarrak, eta jan-edanean ari ziren bitartean, kontu-kontari aritu dira.