Tolosaldeak bere postu onena lortu du Kontxako Banderan, gaurko jardunaldian bigarren egin eta sailkapen orokorrean bigarren postua lortu eta gero. Donostia Arraun Lagunak-ek irabazi du bandera, gaurko estropadan garaipena lortuta. Oriok hirugarren egin du, bai gaur eta baita sailkapen orokorrean ere. Lehenengo luzean aldea atera du Donostia Arraun Lagunak traineruak eta hor erabakita geratu da bandera, lehen jardunalditik hamar segundoko abantaila baitzuen. Ziabogan hirugarren egin du Tolosaldeak, donostiarrengandik hamar segundora eta Oriotik hiru segundora. Bigarren luzean olatuak ondo baliatu ditu eskualdeko traineruak eta denbora onena egin du, donostiarrei hiru segundo kenduz eta Oriori hamar.
Ramon Erostarbe entrenatzaileak azaldu duenez, «lortu dugun bigarren postuari balioa eman behar zaio». Gaurkoan itsaso mugitua zegoen, eta hirugarren kaletik egin dute arraun, kale ona izan ohi dena. «Hasieran bazirudien hirugarren kalea ona izango zela, baina lehen txandan ikusi da lehen eta bigarren kaleak abiadura handia zutela joanekoan, eta gero bueltakoak erakutsi du itsasoan azkarrenak izan garela, eta denei denbora kendu diegula». Lehenengo luzea izan dela gakoa esan du entrenatzaileak: «Aurrea hartu dute beraiek eta ez dute estropada burua utzi. Guk asko egin dugu arraun lehen luzean, eta gero bigarrengoan olatuak hartu eta hartu aritu gara. Meritu handia eman behar zaio egin dugun bigarren postuari. Harrobiko arraunlari gehien atera dugun trainerua izan gara, hamar guztira, eta hori ere esan behar da». Ildo horretatik jarraitu du Erostarbek: «Tolosaldea gara, eta bigarren geratu gara, Orio, Zumaia eta besteen aurretik, eta selekzio bat den Arraun Lagunak-en atzetik geratu gara. Ni oso harro nago bigarren postuarekin, eta klubarentzat eta arraunlarientzat izugarrizko lorpena da. Orain arte postu onena laugarrena izan da. Bigarren egin dugu Kontxan eta bigarren ligan, eta oso gustura egoteko modukoa da».
Aurrera begira ez daki zehazki zer gertatuko den arraunlari taldearekin. «Baten batek utziko du ziurrenez. Oso gogorra da kirol hau, are gehiago barruko klub batentzat. Ea ahal duten gutxienek uzten duten, eta etortzen direnak gustura hartuko ditugu. Jubenilak ere igoko dira, eta denak hartu beharko ditugu kontuan», esan du Erostarbek, eta gehitu du berak klubean jarraituko duela.
Sailkapenak:
Bigarren jardunaldia
- Donostia Arraun Lagunak 11.01,72
- Tolosaldea 11.09,24
- Orio 11.16,38
- Donostiarra 11.19.35
- Hibaika 11.31,69
- Hondarribia 11.31,71
- Astillero 11.31,91
- Zumaia 11.33,24
Sailkapen orokorra
- Donostia Arraun Lagunak 21.30,92
- Tolosaldea 21.48,44
- Orio 21.56,42
- Donostiarra 22.13,67
- Zumaia 22.18,34
- Astillero 22.25,79
- Hibaika 22.28,83
- Hondarribia 22.30,59