Asteasun abiatuko da zirkuitua irailaren 27an, eta estreinako aldia izango du bertan. Eskualdeko beste biak Ibarra eta Aduna izango dira, zirkuituan eskarmentua duten herriak. Asteasuko probaren ondoren, urriko lau asteburutan egingo dira hurrengoak, eta Durangon, Idiazabalen, Kanpezun eta Aian jokatuko dira mendi duatloiak. Azken bi probak eskualdean egingo dira: azaroaren 1ean Ibarran eta 15ean Adunan.
Asteasun egingo den mendi duatloiak bi sektore izango ditu: korrika 8 kilometro, 336 metroko desnibel positiboarekin, eta bizikletaz 16 kilometro, 645 metroko desnibel positiboarekin. Asteasuko proban zein besteetan parte hartu nahi duenak dagoeneko izen emateak irekita ditu Rockthesport.com webgunean.