Udara eta gero berriro martxan jarri dira, eta min batzuk bidean izan badituzte ere «osorik-edo» iritsi ziren probara. Regillagak eta Etxarrik zozketan ez zuten zorte handirik izan eta txapelketan zeuden 5 faboritoetatik 4 beraien multzoan zeuden, beraiek barne. Beraien kata bide onean bazihoan ere ez zuten guztiz biribildu eta kataren amaiera aldean puntu dezente galdu eta gero, multzoko laugarren geratu ziren eta ezin izan zuten finalera pasa. Beraz, iaz lortutako zilarrezko domina defendatu gabe geratu ziren.
Saralegiri eta Regillagari multzo erraza tokatu zitzaien eta arazorik gabe lehen postuan pasa ziren finalera. Bertan kata nahiko biribila egin eta gero, bigarren postua eskuratu zuten, munduko sailkapenerako puntu garrantzitsuak pilatuz. Azken bi txapelketetan espero baino emaitza kaskarragoak lortu eta gero, bolada txar hori mozteko balio izan die.
Aurrera begira, bi bikoteak Alemaniako Maintal hirira joango dira urriko lehen asteburuan, Europako zirkuituko beste proba batera, eta horrekin Parisera begira jartzeko.