Ramon Erostarbe Tolosaldea taldeko entrenatzaileak garbi du zein den helburua falta diren bi estropadetan: «Ahal dugun gorenen geratu nahi dugu bi estropadetan. Aurten ikusi da ondoen itsasoan moldatzen garela. Egia da itsasoko estropada gutxi izan direla, eta besteetan defendatzen gara. Azken estropadetan ikusten ari gara goraka goazela. Gure helburua asteburuan, besteetan bezala izango da, irabaztea. Bide batez, ea lortzen dugun bigarren postua kentzea Oriori, zaila izango bada ere, denboraldian osoa zehar bezala».
Tolosaldea hirugarren doa Euskotren Ligan, 90 punturekin, eta Oriok du bigarren postua, 93 punturekin. Lehen postua ziurtatuta du Donostia Arraun Lagunak traineruak, 105 puntu baititu. Gaur arratsaldean, 17:25etik aurrera, V. Ondarroako Bandera - Cikautxo Sari Nagusia izango da jokoan. Bihar, II. Getariako Ikurrina - Iparragirre 75 urte Sari Nagusia bandera jokatuko dute, 11:20tik hasita.
Denboraldiaren balantzea «oso positiboa» dela esan du Erostarbek. «Estropada bat irabaztea lortu dugu. Aurreko urtean ere bai, banderarik ez bagenuen lortu ere. Baina aurtengoan bandera lortu ahal izan dugu, oso polita gainera. Horrez gain, Euskadiko Txapelketa irabaztea lortu dugu. Beraz, bi bandera oso garrantzitsu dira guretzako, klub bezala, eta talde bezala. Ikusten da pixkana goraka goazela».