Estropada berezienetako batera iritsi da Euskotren Liga. Gaur eta bihar XVII. Zarauzko Ikurrina izango da jokoan, eta bandera irabazteko bi jardunaldietan egin behar dute ondo ontziek, bi egunetako denborak batzen baitira azken emaitza jakiteko. Gaurko estropada 17:25ean hasiko da, eta Tolosaldeak bigarren txandan parte hartuko du. Biharkoa 11:25ean hasiko da eta txandak gaurko emaitzen arabera erabakiko dira. Jardunaldi bakoitzean 1,5 itsas mila egingo dituzte, 2.778 metro, eta bi luze egingo dituzte, ziaboga bakarrarekin.
Tolosaldea hirugarren postuan dago Euskotren Ligan, 76 punturekin. Lehen postuan Donostia Arraun Lagunak dago, 89 punturekin, eta bigarrengoan Orio, 81 punturekin. Itsasoan ondo moldatzen da eskualdeko trainerua, beraz, aukerak baditu ligan bere bigarren bandera lortzeko.