Izaro Etxarri adunarra eta Eñaut Urkaregi larrauldarra, Portugalen jokatu den junior mailako pistako Europako Txapelketan domina bat eskuratzetik hurbil geratu dira, madison proban zehazki. Etxarrik, Leyre Almenarekin bikoa osatuta, azken esprintean galdu dute brontzezko domina, eta laugarren postuarekin konformatu behar izan dute. Urkaregik, berriz, bosgarren postuan amaitu du proba. Larrauldarrak Eric Igualekin osatu du bikoa eta 9 puntu eskuratu dituzte guztira.
Puntuazioko proban bederatzigarren eta hamaikagarren
Larunbatean egin zen puntuaziozko proban, Urkaregi bederatzigarren izan zen. Urkaregik 27 punturekin amaitu zuen proba, eta emandako maila amaierako emaitzak erakusten zuena baino hobea izan zen. Etxarriren kasuan, larunbatekoa ez zen bere egunik honena izan. Espezialitate honetan munduko txapeldunordea den adunarrak, ez zituen bere hankarik honenak aurkitu eta hamaikagarren postuan amaitu zuen.
Jazarpen proban errekorra eta bosgarren postua
Jazarpen probari dagokionez, Etxarrik Espainiako errekorra egitea lortu zuen, Leyre Almenak pasaden urtean ezarritako errekorra zazpi segundoan jaitsiz (3:43.829) denborarekin. Adunarrak Espainiako errekorra ezarri bazuen ere, ez zen nahikoa izan hamar honenen artean sailkatzeko. Urkaregi bera ere bere marka pertsonala hobetzetik bi hamarrenetara besterik ez zen geratu, eta lortu ez bazuen ere, bosgarren postuan sailkatzeko balio izan zion (3:12.242) denborarekin.
Gainontzean, taldekako jazarpen proban ere parte hartu zuten Etxarrik eta Urkaregik. Bakarkako proban bezala, taldekakoan ere Espainiako errekorra egitea lortu zuen adunarrak eta laugarren postuan amaitu zuten. Urkaregi eta bere taldekideek ere proba ona burutu zuten eta seigarren izan ziren azken sailkapenean.