Ez da erraza izan Tolosatik Berrobira iristea. Errepidean lokatza, enborrak eta harriak dira nagusi, eta auto ilarak sortzen dira. Aitzol Izquierdo Berrobiko alkateak esan du, arazo ugari dituztela une honetan herrian. Garaje bat baino gehiagotan sartu da ura, hainbat baserritara iristeko bideak ez daude erabilgarri, plaza eta udaletxe inguruan ur putzuak dira nagusi, errepidean lokatza eta harriak dira nagusi... Guztia bideratzen ari dira orain, eta herritarrak kalera atera dira palak eta eskorgak hartuta euriteen ondorioak leuntzen saiatzeko.
Alegian ere gauza bera. Herrian leku bat baino gehiagotan sartu da ura eta herritarrak 08:00etan bildu dira lanak banatu, eta guztia garbitzen laguntzeko.
Ibarran ere arazo ugari dituzte. Gaua «izugarria» izan dela esan du Igor Zapirain alkateak eta lehentasunak jartzen ari direla guztia bere onera etortzeko. Izaskunen «izugarrizko» luiziak izan dituzte eta 3 bat baserri inkomunikatuta daudela esan du.