Antzinako herri ohiturak, hileta errituak eta argizaiolak ardatz hartuta, Argizaiola liburua osatu dute Joseba Urretabizkaia argazkilariak eta Fernando Hualde historialariak. Euskal Herriko seiehun argizaiola baino gehiagoren irudiak bildu dituzte, eta irizpidea izan da inoiz «benetan erabilitako piezak» izatea, eta «ez apaingarri huts» gisa erabilitakoak.
Liburua Altzo Azpiko Olazabalgo Salbatore elizan aurkeztu zuten iragan asteko ostiralean, eta igandean, berriz, Amezketan. Bertan, Amezketako zortzi emakumek argizaiolen erritua irudikatu zuten performance batean. Gainera, kantu gregorianoen emanaldia egin zuen Donosti Ereski abesbatzak. Argizaiolak piztu zituzten performancean, eta abesbatzaren emanaldiak iraun bitartean piztuta eduki zituzten.