Herritar ugari Bilbora joan dira Buruz Buruko finala bertatik bertara jarraitzera, baina herrian geratu diren zaleak ere izan dira tartean. Amezketan, esaterako, kaleak hustu eta tabernak bete dituzte herritarrak. Tragoa eskuan eta animo mezuak ahoan izan dituzte uneoro eta argi geratu da zein zuten faborito: Altuna.
Alegira sartu orduko nabari zen egun berezia zela; balkoiak Artolaren aldeko kartelez atonduta zeuden eta plazatik oihu ugari entzuten ziren. Herrian geratu diren zaleak plazan bildu dira, Artolaren azken finalean egin zuten antzera, pantaila erraldoi bat jarri baitute herriko plazan. Emozio eta tentsio uneak bizitu dituzte pantailaren bueltan, baina Artolaren aldeko babes eta animo mezuez bete dute herriko plaza.
Behin finala bukatuta, afaria antolatu da bai Amezketan eta bai Alegian, eta bi pilotariei ongi etorri berezia egingo diote bi herritan.
