Sortu eta egun gutxira, 1973ko maiatzaren 20an burutu zuen lehen ekintza Fronte Polisarioak eta urtemuga hori gogoan, elkarretaratzea egin dute, Villabonako plazan, Autodeterminazioa eta independentzia Mendebaldeko Sahararentzat! lelopean.
Ekitaldiok, Maiatza Borrokan egitarauaren barruan sartu ditu Tolosaldea Sahararekin elkarteak. Hain justu, igandean, hilaren 25ean emango zaio amaiera, Bueltaka egitasmoarekin. Urtero moduan, Tolosako Berazubi estadioan egingo dute. Parte hartzaileek egiten duten itzuli bakoitzeko euro bat ordaindu beharko dute, eta helburua ahalik eta parte hartzaile eta itzuli gehien batzea da. Hori horrela, elkarteko kideek herritar guztiak animatu dituzte kirola eta elkartasuna uztartzen dituen ekitaldian parte hartzera.