Atzo aurkeztu zuten Topic aretoan 25 urte, Tolosaldea Sahararekin dokumentala. Izen bereko elkarteak ekoitzi eta 'Ataria'-ko kazetari Leyre Carrasco Vazek osatu du. Ataria.eus webgunean datorren astean ikusgai egongo da, guztion eskura.
Duela mende laurden sortu zuten elkartea Mendebaldeko Sahararen autodeterminazio eskubidea eskualdean zabaldu eta sahararren giza eskubideak errespeta daitezen eskatzeko. Hainbeste denbora pasata, oraindik ere ebatzi gabe jarraitzen du gatazkak; lurraldearen zati bat okupatua du Marokok eta milaka herritarrek errefuxiatuta jarraitzen dute basamortu erdian, Aljeriako Tindufen.
Tolosaldea Sahararekin elkarteak, beraz, ez du uste ospatzeko ezer duenik. Hala ere, data borobila baliatu dute urteotan hainbat herritarrek eskualdean egin duten borroka aintzat hartzeko eta, bide batez, indarrak hartzeko, ahalik eta lasterren, Sahara hurra izan dadin, libre.
