Maiatzaren 1ean, gimnastika erritmikoko oinarrizko taldeen Espainiako Kopa jokatu zen Granadan (Andaluzia). Tolosa CF Gimnastikako hiru taldek eta Ibarrako Belabieta Kirol Klubeko jubenil taldeak parte hartu zuten txapelketan. Tolosako klubeko kadete nesken Tolosa P taldea txapeldunorde izan zen; Kanariar Uharteetako Batistana de Tenerife taldea izan zen txapeldun. Taldetik adierazi dutenez, «ariketa bikaina» burutu zuten, eta horri esker, zilarrezko domina jantzi zuten. Kategoria berean, Tolosa H taldea hamaikagarren postuan sailkatu zen. Belabieta Kirol Klubari dagokionez, berriz, jubenil mailako taldeak parte hartu zuen Espainiako Kopan, eta bere kategorian, 21. postuan sailkatu zen.
Tolosako klubeko ordezkariek nabarmendu dutenez, «oso harro» daude kadeteek lortutako emaitzarekin, «batez ere, bide luzea eta ahaleginez betea izan delako». Tolosa P taldeko kideek, berriz, Nerea, Sara, Arantxa, Eneritz, Maitane eta Borja prestatzaileen lana eskertu dute. «Denboraldi guztian zehar egindako lanaren ondorioa da. Bigarren postu hau guztiona da. Eskerrik asko gure entrenatzaileei, eta senide eta lagun guztiei. Zuek gabe ezin izango genukeen lortu», adierazi dute.
Maiatzaren 4an, igandea, Granadan bertan, senior taldeen txanda izan zen. Taldekako Espainiako Kopako lehen fasean parte hartu zuten tolosarrek eta ibartarrek. Bi taldeak lehen aldiz ari dira parte hartzen absolutu mailan. Ibartarrak 13. postuan sailkatu ziren, eta taldetik adierazi dutenez «asko gozatu» zuten.