Jokin Altuna espezialista hutsa da Buruz Buruko Txapelketako final-laurdenetako ligaxkako azken partidetan, eta beste behin erakutsi zuen hori, atzo, Bilboko Bizkaia pilotalekuan: 22-4 irabazi zion Dario Gomez lagun handiari.
Hasieran, neurketa estua izango zela zirudien, 1-3 aurreratu baitzen Dario. Altunak, baina, sakea berreskuratu ondoren, hamabost tanto egin zituen segidan. Errioxarrak eskuin eskuan min zuela jokatu zuen; deseroso zebilen kantxan, ezinean. Hala ere, Altunak neurketa bikaina jokatu zuen taktikoki eta teknikoki. Etengabe bilatu zuen Darioren ezker eskua, eta horrela, pixkana aurkaria higatu zuen. Uneoro topatu zituen tantoa amaitzeko aukera egokiak.
Gauzak horrela, Altuna III.a zazpigarren aldiz ariko da Buruz Buruko Txapelketako finalerdietan, seigarren aldiz jarraian. Lasoren aurka jokatuko du, maiatzaren 17an edo 18an. Beste finalerdirako, aurkariaren zain dago Larrazabal: Peio Etxeberriaren eta Iñaki Artola alegiarraren artekoan irabazten duena izango du parean.
Arrillaga, Labriten
Bestalde, Miriam Arrillaga Amasa-Villabonako Behar Zana Pilota Elkarteko pilotari usurbildarrak Nafarroako Irekia txapelketako finalerdia irabazi zuen, atzo, Lekunberriko Jaian Jai frontoian. Amaia Aldairekin osatu zuen bikotea eta 22-17 irabazi zieten Ibarrolari eta Gaminderen ordez aritu zen Bertizi. Partida lehiatu eta ikusgarria izan zen. Aldaik eta Arrillagak igandean jokatuko dute finala, Iruñeko Labrit pilotalekuan, Salsamendi-Mendiburu bikotearen aurka. 12:00etan hasiko da jaialdia eta ETB-k zuzenean emango du.
