Final laurdenetako ligaxka azken txanpara iritsiko da asteburuan. B multzoko bigarren jardunaldia lehiatuko da. Iñaki Artolak larunbatean jokatuko du Unai Lasoren aurka Labriten, Iruñean. Igandean, Peio Etxeberriak eta Elordik neurtuko dituzte indarrak, Zumaian.
Alegiarrak lehen partida irabaztea lortu zuen, 22-16ko emaitzarekin. Lasok ere gauza bera egin zuen 22-12koarekin. Larunbatean, beraz, irabazleak sari handia izango du: finalerdiak.
Puntu beharrean gelditzen denak, ligaxkako hirugarren jardunaldian lor lezake saria. Artolak partida horretan Peio Etxeberria izango du aurrean.
Alegiarraren kasuan, bi partida horiek galduta ere sailkapena lortzea izango luke, tanto kopurua kontuan hartuta. Horretarako, ordea, beste pilotarien emaitzen menpe geratuko litzateke.
Jokin Altuna, hil ala bizi
Altuna III.aren kasua desberdina da. Bi jardunaldi jokatu ondoren Dariorekin berdinduta agertzen da. Final laurdenetako ligaxkaren azken jardunaldian elkarren aurka jokatu behar dutenez, irabazleak aurrera egingo du eta galtzailea txapelketatik kanpo geratuko da. Partida hori maiatzaren 4an jokatuko da, Bilboko Bizkaia pilotalekuan.
Amezketarrak joan den igandean 22-15 irabazi zion Zabalari.
| A Multzoa | |||||
| IP | JP | TA | TAu | Ko | |
|---|---|---|---|---|---|
| LARRAZABAL | 2 | 2 | 44 | 34 | 10 |
| DARIO | 1 | 2 | 42 | 39 | 3 |
| ALTUNA III | 1 | 2 | 36 | 37 | -1 |
| ZABALA | 0 | 2 | 32 | 44 | -12 |
| B Multzoa | |||||
| IP | JP | TA | TAu | Ko | |
| LASO | 1 | 1 | 22 | 12 | 10 |
| ARTOLA | 1 | 1 | 22 | 16 | 6 |
| ELORDI | 0 | 1 | 16 | 22 | -6 |
| P.ETXEBERRIA | 0 | 1 | 12 | 22 | -10 |