Bedaiok Tolosako auzo izateari utzi nahi dio, eta Amezketaren parte izan nahi du. Hala zioen hedabide batek otsailaren 20an argitaratutako albiste baten titularrak. Albiste horren arabera, auzotar talde batek proposamen bat egin zuen, auzoak herriarekiko duen distantzia luzea dela argudiatuta.
Biharamunean, hedabide berdinak, auzotarrek erabakia hartzeko bilera bat egingo zutela zioen beste albiste bat argitaratu zuen. ATARIA-k jakin duenez, baina, auzotar talde batek deituta, bilera informatibo bat egin zuten gai horri buruz hitz egiteko, baina oraingoz, ez dute erabakirik hartzeko asmorik. Auzotarrak, gainera, «harrituta» daude albistearekin. Amezketako Udalak ere «sorpresaz» irakurri zuen albistea: «Modua ez zen egokia izan», esan du Mikel Arteaga alkateak. «Auzotarrek bilera bat egin zutela esan ziguten, baina gaia aztertzea eskatu ala ez erabaki nahi zuten, eta ez Tolosatik joan ala ez erabaki».
Tolosako Udalaren azken osoko bilkuran, gai honen inguruan galdegin zion EAJk udal gobernuari. Tolosako alkate Andu Martinez de Rituertok argi erantzun zien: «Prest gaude auzotarren asmoak entzuteko, eta beraiek udalerritik aldendu nahi izanez gero, laguntza emango diegu legezko aukera guztiak ebaluatzeko prozesuan». Amezketako Udala ere prozesu horretan «laguntzeko prest» egongo litzatekeela adierazi du Arteagak.
Ezer erabaki aurretik, baina, Martinez de Rituertoren ustez «oso ondo eta lasaitasunez» aztertu behar dira halako erabaki batek eragin litzakeen ondorio guztiak, «inplikatutako alderdi guztientzako irtenbiderik onena» bilatu aurretik. Amezketako alkateak «ezjakintasuna» nabarmendu du egoera honen aurrean. «Erabakia urruti ikusten dut oraindik. Eskaerarik iritsiz gero, azterketa oso sakona eta bateratua egin beharko genuke; denbora beharko litzateke, eta alderdi guztiek izan beharko genuke prozesuaren parte, akordio bat lortu arte. Erabaki bat hartu nahi izatekotan, prozesu luze baten aurrean geundeke», esan du.
Anexioa gertatuz gero, Amezketako biztanleriak %10 egingo luke gora. «Amezketarrak 1.000 gara; bedaiotarrak, berriz, 100 inguru. Gainerakoan, egunerokotasuneko zerbitzuetan izango luke eragin handiena», esan du alkateak.
Martinez de Rituertok osoko bilkuran onartu zuen Bedaiotik Tolosarekiko «mesfidantza historiko» bat dagoela, aspalditik datorrena: «Uste dut beti izan dutela udala gehiegi arduratu ez denaren sentsazioa, bai orain, bai duela lau urte, baita duela 50 urte ere». Hala ere, gaineratu zuen auzotarrak «pozik» daudela udal gobernuak abian jarritako Auzoen Mahaia estrategiarekin eta AuzoEkin proiektuarekin.