Judo Klub Tolosako judokek emaitza bikainak lortu zituzten pasa de asteburuan. Batetik, Unai Saralegi tolosarrak eta Unai Regillaga amezketarrak Judoko Nazioarteko Federazioak eratu berri duen World Series zirkuituko proban hartu dute parte. Belgikako Louvain-la-Neuve herrian izan da zirkuitua eta Europan egiten ziren Europako Kopen antzeko egitura duela esan du klubak. «Proba hauek oso garrantzitsuak dira munduko rankingari begira. Nage no Kata modalitatean 22 bikotek hartu zuten parte. Sailkapen fasea izan genuen lehenik eta munduko sailkapena kontuan izanda serie-buru izan ginen, holandarrek ez baitzuten parte hartu».
Hori dela eta, Judo Klub Tolosakoak 8 bikoteen artean lehen postuan sailkatu ziren 384,5 punturekin. Finalean 9 bikotek hartu zuten parte eta azken postuan atera ziren eskualdekoak; «lan oso ona» egin eta gero 390 puntu jaso zituzten, bigarren postua eskuratuz. Italiarrek lortu zuten puntu gehien (391,5) eta brontzezko domina Extremadurako bikoteak eskuratu zuen 387 punturekin. «Emaitza honekin munduko sailkapenean lehen postuan berdinduta geratzen gara Herbehereetako bikotearekin, eta estatuko sailkapenari begira ere Extremadurako bikotearekin aldea apur bat handitu dugu».
Espainiako kopa
Bestetik, Joseba Regillaga amezketarra eta Joseba Etxarri tolosarra Alacanten izan ziren Espainiako Kopan. Lehen postua lortu zuten 435,5 punturekin, bigarren postuan geratu zen bikote asturiarrari 31,5 puntuko aldea aterata.
Bikotea beraz Espainiako sailkapenean hirugarren postuan egonkortu da, laugarrenari alde handia aterata eta ondorioz, Europako Txapelketarako sailkapenera gerturatuz.
Hurrengo helburuari begira ere bikote bakoitzak bere bidea egingo du. Unai Saralegik eta Unai Regillagak apirilaren 12an Frantziako Reims herrian egingo den World Series batean parte hartuko dute, eta Joseba Regillaga eta Joseba Etxarri apirilaren 19an Portugalen jokatuko den Trofeo Iberico proban ariko dira, Espainiako sailkapenerako puntuak pilatzen jarraitzeko asmoz. Horren ostean, bi bikoteak maiatzaren 31n Rigan (Letonia) jokatuko den Europako Txapelketara begira jarriko dira.