Txomin Perurena eta Patxi Alkorta oroitzen dituen txirrindulari lasterketaren 20. edizioa jokatu zen atzoko. Adunatik irten ziren txirrindulariak, eta bertan, Pakea eta Gorostidiren alargunek lore sorta bana jaso zuten.
Lasterketa gogorra eta arriskutsua izan zen atzokoa, haizea protagonista izan baitzen. 20 kilometroren faltan boskote batek hartu zuen aurrea, baina jarraian Fabrizio German Crozzolo argentinarra izan zen bakarrik geratu zena. Klasika irabaziko zuela zirudienean, Cesar Perezek atzetik aurrerako lan ikusgarria egin eta Crozzolo harrapatzeaz gain atzean utzi zuen. Finisher taldeko txirrindularia iritsi zen lehen postuan Villabonako helmugara. Zazpi segundora Crozzolo helmugaratu zen eta podiuma Martin Rey Vazquezek osatu zuen.
Sari banaketa ekitaldian Guillermo Olano eta Marisol Manzano senar-emazteak omendu zituzten, txirrindularitzari egindako ekarpenagatik.