Guztira 25 talde izango dira lehian, gizonezkoen afizionatu mailakoak, eta talde bakoitzean 7 txirrindulari. Beraz, Aiztondo bailarako eta inguruko errepideetan 175 txirrindulari ariko dira nor baino nor. Adunatik ateratzean bost itzuli egingo dituzte bailaratik, tartean Zizurkilgo Herrigunera eta Adunara igoz. Seigarren itzulia luzeagoa izango da, eta Anoetaraino joan ondoren, Alkizara igoko dira, berriro Aiztondo bailarara jaisteko. Beste bi itzuli egin beharko dituzte txirrindulariek helmuga iritsi aurretik, baina oraingoan Zizurkilgo Fraisoro aldetik igo eta Muga Ranch ondotik pasa ondoren, Sarasola sagardotegi aldera joko dute, handik jaitsi eta berriro Zizurkilgo Herrigunea eta Aduna igoz. Villabonako Kale Berrian izango da helmuga. Lasterketa Espainiako Koparako baliagarria da.
Igandetan egin ohi da Aiztondo Klasikoa, baina aurtengoan egun osoa hartu nahi zuten, txirrindulari karrera bera arratsaldez eginez. Azkenean, 15:00etarako amaitzeko agindua jaso zuten antolatzaileek, eta goizetik antolatu behar izan dute proba. Berritasun modura, haurrentzako ginkana bat egingo da,09:00etan hasita, Adunan bertan.