Eskualdean, Tolosan ez ezik, beste herri gehiagotan ere ospatzen dira inauteriak. Lizartzarren eta berastegiarren txanda izan zen pasa den asteburuan, eta gaur, Ikaztegietan, Ostiral Mehe Eguna ospatu dute, hirugarrenez, Pako Belea konpartsak Ikaztegietako Udalarekin elkarlanean antolatuta.
Aurten ez dute afari herrikoirik egingo, baina giro polita izan dute arratsaldean, Alegiako Juanito eta Karmele erraldoien bisitarekin. Oinez egin dute Ikaztegietarainoko bidea, aurrez, Tolosatik pasata. Hala aitortu du Javi Landa Alegiako Erraldoiak taldeko kideak: «Berezia izan da. Gure erraldoiek joareak dituztela eta, joaldunek Iturendik Zubietarainoko bidea egiten duten bezala, Alegiatik etorri gara oinez, Tolosatik igaroz. Askok ez dute jakingo, baina Alegia eta Ikaztegieta arteko bidean, tarte bat Tolosa da, eta beraz, Ikaztegietako Inauterietara bidean, Tolosako Inauterietatik ere igaro gara».
Ondoko herriko sarrerara heldu dira, baina bertan ez zen ikaztegietarrik edo madril txikirik ageri, eta zain egon behar izan dute. Behin erraldoi guztiak elkartu direnean, dultzaina eta trikiti doinuekin egin dute ostatu parerainoko bidea. Bertan dantzan aritu dira, baita gero herriko txoko gehiagotan ere, eta plazan eman diote amaiera kalejirari.
Bi herrietako erraldoien ikuskizunaren ondoren ere jarraitu du festak, txokolate jatea eta photocall-a izan baitituzte gerturatu diren guztientzat. Jun Da Jo txarangak ere girotu ditu herriko kaleak. Hori gutxi ez, eta aurten, gainera, mozorro lehiaketa egin dute; denetariko sariak egon dira.
