Binakako Pilota Txapelketaren sailkapen fasean seigarren postua lortu arren, azkenean finalerdietarako txartela lortu dute Jon Ander Peña tolosarrak eta Jon Ander Albisu ataundarrak. Atzoko partida erabakigarrian 22-18 irabazi zieten Zabala eta Eskuzari. Azken hauek Elordi eta Zabaleta ordezkatu zituzten, eskuko minez baitzeuden. Partida oso lehiatua izan zen Eibarren jokatutakoa, eta Zabalak eta Eskuzak asko estutu zituzten Peña II.a eta Albisu.
Hori horrela, eskualdeko hiru pilotari izango dira lehian finalerdietan: Martxel Iztueta tolosarra Lasorekin, Iñaki Artola alegiarra Mariezkurrena II.arekin eta Peña II.a Albisurekin. Asteburuan jokatuko da finalerdietako lehen jardunaldia. Artola eta Mariezkurrena II.ak Laso eta Iztueta izango dituzte aurkari, Bilboko Bizkaia frontoian, larunbatean. Peña II.ak eta Albisuk igandean jokatuko dute, Gasteizko Ogeta pilotalekuan.
Gabirondo, txapelketatik kanpo
Binakako Serie B Txapelketan, Arkaitz Gabirondo gazteluarra txapelketatik kanpo geratu da, asteburuan play-offetako partida galdu ostean. Dariorekin batera Salaberria eta Gaskueren aurka zuten partida, eta 15-22 galdu zuten.