Villabona eta Zizurkilgo Oria merkatari elkarteak antolatuta, Stock Azoka ari dira egiten. Herritarrek, beraz, neguko beherapenen azken txanpan, maukak eskuratzeko aukera izango dute. Arratsaldean zabaldu dute ekimena, eta bat egin duten 15 saltokik kalera atera dituzte euren produktuak, ohi baino prezio baxuagoan. Bihar goizean ere, gauza bera egingo dute, eta saltokietatik kanpo erakutsiko dituzte salgaiak deskontuekin.
Ekimena girotzeko, erraldoiak eta buruhandiak atera dira kalera, eta bihar, larunbata, Kolpez Blai taldekoak ariko dira kalez kale 11:30etik 12:45era.
Merkatariek azaldu dutenez, «kezkatuta» daude kaleak «hutsik» sumatzen dituztelako eta Stock Azokarekin komertzio txikiak biziberritzen laguntzea espero dute. Herritarrak animatu dituzte azokara gerturatzera: «Ea denen artean kaleak bizirik mantentzea lortzen dugun. Erosketak herrian egiten ez baditugu egoerak okerrera egingo du. Inoiz baino beharrezkoagoa da merkataritza txikia babestea».
Honako saltokiek hartuko dute parte asteburuko Stock Azokan: Garazi loradenda, Zizurkil elektrizitatea, Boutique MP, Elizmendi kirolak, Villabona optika-audiologia, Zubimuxu arropa denda, Galerias MJ, Bronte optika, Amane arropa denda, Duna oinetakoak, Garintza mertzeria, Ugalde oinetakoak, Minimarket JC, Ane mertzeria eta Gema loradenda.