Euskadiko Pilota Federazioak presidente berria izango du: Joxe Mari Mitxelena (Oiartzun, 1958). Larunbatean egin zituzten hauteskundeak, Abadiñon (Bizkaia), eta hura izan zen boto gehien jaso zuena: 47. Enaitz Olaeta beste hautagaiak, berriz, 30 boto eskuratu zituen. Otsailaren 1ean hartuko du kargua Mitxelenak, eta orduan hasiko du datozen lau urteetarako agintaldia, Gotzon Enbil ordezkatuta. Zortzi urte egin ditu karguan Enbilek.
Presidentetzarako bi hautagaiek dute eskarmentua, biak aritu baitira Enbilekin lanean: Mitxelena federazioko diruzaina izan da, eta Olaeta, ordezkari, Bizkaiko Federazioko presidente gisa. Bada, Mitxelena buru duen Pilota Zazpi Haizetara hautagaitza nagusitu da.