Azpeitian eta Donostian egun handia dute astelehenean, San Sebastian eguna ospatuko baitute. Eskualdean ere badira egun hori ospatzen duten herriak, eta horietan ere astelehenean izango dira ekitaldiak.
Berastegin, esaterako, 11:00etan meza izango dute Erretore etxeko kapilan. Garai batean San Sebastian ermitan bertan egiten zen meza, baina azken urteetan ez dute bertan egiten.
Leaburu-Txaraman, 17:00etan izango da meza San Sebastian ermitan, eta ondoren, herriko dantzariek dantza saioa eskainiko dute. Amaitzean, Leaburuko ostatuan elkartuko dira, mokadutxoa hartzeko.
Orendainen, bestalde, 10:45ean kalejira egingo dute trikitilariek girotuta, herriko plazatik San Sebastian ermitara. 11:00etan izango da meza, eta ondoren, hamaiketakoa egingo dute kultur etxean. 14:00etan, berriz, bazkaria izango da Eltxo elkartean.