Elkarren arteko partida jokatzeke, Ezkurdia-Rezusta eta Laso-Iztueta sailkapen nagusiko lehen bi postuetan daude. Zailtasunak, ordea, Jokin Altunak eta Jon Ander Peñak dituzte. Amezketarrak azken jardunaldian galdu egin zuen, Arangurenekin bikotea osatuz. Bi puntu besterik ez dituzte. Ondoren, bakarrarekin, tolosarra dago, Albisu lagun duela. Hauek ere zazpigarren jardunaldiko partida galdu egin zuten.
Zortzigarren jardunaldia
Atsedenerako denborarik gabe, hurrengo jardunaldia bihar hasiko da. Altuna III-Arangurenek Amorebietan jokatuko dute, oraindik partidarik irabazi ez duten Etxeberria-Martijaren aurka.
Larunbatean, Bilbon, Ezkurdia-Rezustak eta Elordi-Zabaletak jokatuko dute.
Igandean, Tolosako Beotibar pilotalekuan izango da jaialdia. Eskualdeko bi ordezkari izango dira bertan, elkarren aurka. Jaka lizartzarrak Imaz izango du atzean; Peña II.ak, aldiz, Jon Ander Albisu.
Jardunaldia Eibarko Astelenan amaituko da, astelehenean. Hemen ere eskualdeko bi ordezkari egongo dira. Artola alegiarrak, Mariezkurrena II.a atzean duela, Laso eta Iztueta tolosarraren aurka jokatuko du.
Sailkapena
1. Ezkurdia-Rezusta 6-0
2. Laso-Iztueta 5-1
3. Elordi-Zabaleta 5-2
4. Artola-Mariezkurrena II 5-2
5. Jaka-Imaz 3-4
6. Altuna III-Aranguren 2-5
7. Peña II-Albisu 1-6
8. Etxeberria-Martija 0-7