EHNE eta ENBA sindikatuek deialdia «errespetatu» arren, ez zuten protesta babestu, «mezu askorekin» bat egonik ere, «proposamen zehatzagoak» planteatu nahi zituztelako. Horrela, martxoaren 1ean euren mobilizazioa egin zuten. Baserritarrak Gipuzkoako hainbat lekutatik, tartean Tolosaldetik, Donostiara joan ziren, Gipuzkoako Batzar Nagusien aurrean beraien eskaerak plazaratzeko.
Bi sindikatuek agintari publikoei eskatu zieten elkarlanerako bidelagun izan daitezen, arazoak konpontzeko aktibo izanik eta ez kontrara hauen sortzaile. Gainera, gobernantza sistema iraunkor eta eraginkorra adostea eskatu zieten erakundeei. Prozedimenduak arintzeko Gipuzkoako Foru Aldundiaren eta sektoreko ordezkarien arteko lantaldea osatzeko proposamena ere egin zuten.