Adunar askok hartu dute parte aurten festaren antolakuntzan eta horietako batzuk hartu zuten hitza ekainaren 16an: Juan Kruz Igerabide idazle adunarrak egin zien ongietorria gainerako eskola txikiei berak sortutako testua irakurriz; eta, eguerdi partean, Beñat Igerabide eta Leire Berasaluze musikariek propio festarako sortutako kantua aurkeztu zuten.
Aurtengo edizioko logoak sagarra irudikatzen zuen eta urtean zehar Gipuzkoako eskola txikietan sortu dituzten sagarrak zintzilikatu zituzten Adunako plazan landatutako arbolan. Segidan egin zuten lekuko aldaketa. Ezkio-Itsasoko Herri Eskolak hartuko du ardura datorren urteko Eskola Txikien Festa antolatzeko.
Altzoko eskolaren 25. urteurrena
Samaniegok eta Orixek mende erdia
Samaniego ikastetxeak 50. urteurreneko festa egin zuen apirilean. Gurasoek, irakasleek eta ikasleek herritarrekin batera ospatu zuten mende erdia. Kalejiran ibili ondoren, arratsaldean Zerkausian umeentzako jolasak egin zituzten, eta iluntzean Plaza Berrian helduentzako kontzertuak. Orixe institutuak, berriz, bere 50. urteurrena ospatu zuen abenduaren 10ean Leidorren egindako ekitaldi batean.
60. urteurrena Zubimusu ikastolak
Azaroaren 15ean, 60. urteurrena ospatzen hasi ziren Villabona-Zizurkilgo Zubimusu ikastolan. Joan den azaroaren 15ean, Txerminen 60 zenbakiaren argazki erraldoia atera ostean kalejiran joan ziren Villabonan zehar. Ondoren, trikitiaren doinuan dantzan eta soka saltoan ibili eta aurpegiak margotzen jardun zuten. Festarekin amaitzeko txokolate beroa hartu zuten bildutakoek.