Egitasmo propioez gain, Andragorak parte hartu du indarkeria matxista kasuak salatzeko mobilizazioetan eta baliabideak eskaini dizkie indarkeria jasan dutenei, kasurako, Tolosako osteopataren sexu erasoen inguruko entzute-guneak.
Andragoraren helburua da, besteak beste, emakumeak elkartzeko, eztabaidatzeko, ikasteko eta ahalduntzeko gune segurua eta kolektiboa izatea. Horrez gain, arduradunen hitzetan, baliagarria da agenda feminista politikaren ardatz nagusian kokatu ahal izateko, eta, horrela, feminismoaren helburu politikoak txertatzeko. Jardunari dagokionez, bertan parte hartzen duten eragileekin denetariko ekimenak antolatu dituzte, eta horretarako, beharrezko tresnak zein espazioak zabalduz eta metodologiak berriztuz; betiere, kontuan hartuta egon daitezkeen desberdintasunak eta intersekzioak. Aipatutakoaz gain, prozesu estrategiko eta eraldatzaileagoak lortzeko bidean laguntzea eta aurrera egitea ere badute xede.