«Tokian tokiko errealitateak ulertzea eta horietara egokitzea da gure arrakastaren gakoa», azaldu du Mendizabalek. «Udalerri txikienek askotan baliabide mugatuak dituzte, eta gure helburua da haien proiektuak aurrera eramateko laguntza ematea».
Azken urteotan, Udal Sailak ingurumenarekin lotutako hainbat proiektu estrategiko bultzatu ditu, hala nola, energia berriztagarrien sustapena edo ekonomia zirkularraren inguruko ekimenak. Halaber, garraio publikoaren erabilera areagotzeko eta azpiegitura jasangarriak hobetzeko planak martxan daude. «Garapen ekonomikoa eta jasangarritasuna elkarrekin uztartzeko beharra gero eta handiagoa da. Horretarako, udalerri bakoitzaren indarguneak eta erronkak zehaztasunez aztertzen ditugu», azaldu du.
Tolosaldea Garatzenek sustatzen duen Idazkarien Foroa, bestalde, Tolosaldeko idazkari eta idazkari-kontuhartzaileen bilgunea da; bere helburua eskualdeko udalerri desberdinetako idazkarien artean lankidetza sustatzea eta eguneroko jardunean dituzten erronkei erantzuteko baliabideak eta informazioa partekatzea da. Tolosaldeko udalerri txikiagoetako administrazioak indartu nahi dira.