Korrontzi musika talde bizkaitarrak 20 urte bete ditu aurten. Efemeridea ospatzeko, bere hamabigarren diskoa argitaratu du: Korrontzi 20. Sorpresaz betetako lana aurkeztearekin batera, Euskal Herrian zein munduan zehar bira berezia egiten ari dira, eta ostiralean, Tolosan egingo dute azken kontzertua. Leidor antzokian izango da, 20:00etan. Sarrerak eskuragarri daude oraindik Leidorreko leihatilan edo Leidorantzokia.janto.es webgunean.
Agus Barandiaran buru duen taldea lehen aldiz izango da Tolosan, eta azken bi hamarkadetan ezagunak egin diren folk abestiak entzuteko aukera izango da. Ez da bakarrik arituko, Tolosako Udaberri Dantza Taldea ere igoko baita oholtzara, zazpi probintzietako euskal dantza tradizionalak folk musikarekin interpretatzera. Ez da talde bizkaitarra eta tolosarra elkartuko diren lehen aldia izango, ordea, 2022an, Boiseko (Idaho, AEB) San Inazio jaialdian parte hartu baitzuten. Udaberriz gain, eskualdeko beste bi taldek ere parte hartuko dute: Lizartzako Otsolar dantza taldeak eta Amasa-Villabonako Oinkarik.