Tratu onen eguna ospatu zuten, atzo, Albizturren. Egitasmoan parte hartu zuten Albizturko, Bidania-Goiazko eta Errezilgo ikastetxeetako Lehen Hezkuntzako eta Haur Hezkuntzako haurrek, zehazki, 101 ikaslek eta 12 irakaslek.
Proiektua Berdintasun planeko Hezkidetza programaren barruan gauzatu dute eta, taldeka, 'Tratu onen txangoa' jarduera egin zuten. Horren barruan, hiru txokotan aritu ziren ikasleak: magoa, ipuin kontalaria eta pailazoa. Eta haur batzuk txangoan zeuden bitartean, beste haurrak frontoiak bildu eta «txoko ezberdinetan» bestelako jarduerak egin zituzten tratu onekin lotuta.
Proiektuak helburu du haurrak zein irakasleak tratu onen inguruan kontzientziatzea, eta hiru herri horietako ikastetxeetako haurrek elkar ezagutzea zein «leku berriak» ezagutzea.