Itxaso Erasun finalerdietan izango da

Orozkoko eta Arrigorriagako jardunaldi bikoitzaren ondoren, Lau eta Erdiko Laboral Kutxa Masterrak ezagutzen ditu dagoeneko datorren igandean Basaurin –jaialdia zuzenean eskainiko du ETB-1ek– finalerdiak jokatuko dituzten lau pilotarien izenak. Final laurdenetako partiden ondoren geratu den karteldegia luxuzkoa da, eta iazko bi finalistak, Amaia Aldai eta Goiuri Zabaleta, aurten Sestaon errepikatzeko moduan daude, baina horretarako Behar Zana elkarteko Miriam Arrillaga eta Itxaso Erasun gainditu beharko dituzte aurretik, eta ez dituzte gauzak erraz izango.

Bere aurtengo lehen partidan, egungo txapeldunak, Amaia Aldaik, bere burua estutu behar izan zuen Nora Mendizabalen aurka. Partida borrokatua eta parekatua izan da bere hasieran, zazpigarren tantora arte, baina une horretan Aldai erasokorrago agertu zen jokoan eta markagailuan aurrea hartu zuen (13-7) errematerako dituen dohainei esker. Hala ere, dimoztarrak saketik egindako falta batek partidan sartu du berriro Mendizabal, eta markagailuari parekotasuna itzuli zion (16-16) Amaia Aldaik txapa azpian bidali zituen pilotei eta bere tantoei esker. Hala ere, egungo txapeldunak bere erremateak gehiago zehaztu eta garaipena lortu zuen (22-17).

Miriam Arrillagak gauzak askoz errazago izan zituen, eskuetatik justu xamar, bere burua defendatzearekin nahikoa izan zuen elkarte bereko Miren Larrarte bidaniarraren aurka, 14-2 aurreratuta. Bidanikoak hobera egin zuen bigarren zatian, baina emaitza txukuntzearekin konformatu behar izan zuen (22-15).

Hala eta guztiz ere, garaipenik sendoena Goiuri Zabaletak lortutakoa izan zen, bere lehen banakako txapelaren bidean sendo, sasoi ezin hobean dagoela berretsiz. Bere erremateetan oso inspiratuta, ez zion inolako aukerarik eman Ermuan Etxegarariren aurka horren itxura ona eman zuen Andrea Capellani (22-9).

Azkenik, finalerdietan gertatzen dena gertatzen dela, Itxaso Erasunek urte bikaina borobildu du, eta bere jokoan sekulako jauzia egin duela berretsi zuen, Leire Garai gainditu ondoren, finalerdietarako txartela lortuz. Kaiolak bere sasoi onenetik urrun harrapatu du gasteiztarra uda honetan jasan duen lesio luzearen ondoren eta zizurkildarrak 22-14 gainditu zuen gasteiztarra.