Aurtengo kanpainak azpimarra berezia jarri nahi izan du kanpainaren jatorrizko ideian, hau da, Nafarroa erdi eta hegoaldeko euskalgintzari bidali beharreko elkartasunean. Eta baita lortu ere; Errigoraren kanpaina onenetakoa izan da aurtengoa eta 16.000 saskiren bidez 230.000 eurotik gora bideratuko da Ager zonaldeko euskalgintzara (AEK, ikastolak, Sortzen eta Agerraldia). «Kopuru hau inoiz saskien bidez lortu den handiena da, beraz, badugu zer ospatu», esan dute.
Ezin hobeak diren emaitza horien atzean komunitate oso baten ahalmen eta ahalegina dagoela nabarmendu dute arduradunek. «Errigoraren komunitatea osatzen duten bolondres, ekoizle eta kontsumitzaileek jarritako indarrari esker lortu dugu aurtengo kanpainaren arrakasta. Auzolanari esker soilik da hau posible».