Jokin Altuna eta Erik Jaka izan dira Lau eta Erdiko Txapelketaren final-laurdenetako ligaxka gainditzea lortu duten eskualdeko bi pilotariak. Amezketarraren kasuan, 8 tanto egin behar zituen finalerdietara sailkatzeko, eta 13 berriz multzoko lehen postua bereganatzeko. Altuna III.ak partidako lehen unetik aginte makila hartu zuen, eta Zubizarreta III.ari 22-6 irabazita A multzoko lehen postuan amaitzea lortu du.
Multzo berean, lizartzarra izan da finalerdietarako sailkatu den bigarren pilotaria. Azken jardunaldira puntu bakarrarekin iritsi zen Erik Jaka, baina Iñaki Artolak izandako lesioarengatik, partida jokatu gabe bigarren puntua eskuratu eta txapelketako lau onenen artean izango da.
Peña II.aren kasuan, ligaxkako lehen puntua bereganatu zuen Peio Etxeberriaren aurka, 22-13 irabaziz. Tolosarra finalerdietara sailkatzeko aukerarik gabe iritsi bazen ere, zapore onarekin amaitzea lortu zuen aurtengo Lau eta Erdiko Txapelketa.
Peio Etxeberria eta Unai Laso, ate joka
Finalerdiak asteburuan jokatuko dira. Larunbatean, Iruñeko Labrit pilotalekuan, Erik Jaka lizartzarrak egungo Lau eta Erdiko txapeldunordea den Peio Etxeberriaren aurka neurtuko ditu indarrak 17:15ean hasiko den jaialdian. Jokin Altunak berriz, igandean bere ibilbide profesionaleko bederatzigarren finalerdia jokatuko du erreskadan Lau eta Erdiko Txapelketan. Unai Laso izango da amezketarraren aurkaria, eta jaialdia, Eibarko Astelehena pilotalekuan jokatuko da.