Eskualdeko lau pilotari ari dira parte hartzen Lau eta Erdiko Txapelketan, eta horietatik bik lehen puntua eskuratu dute, eta beste biek punturik gabe jarraitzen dute. Bi pilotarik elkarren aurka jokatu dute, Altuna III.a amezketarrak eta Artola alegiarrak, eta modalitateko egungo txapeldunak irabazi zuen: Altuna III.ak 22-12 irabazi zion Artolari. Alegiarrak huts egite gehiago egin zituen eta horrek kondenatu zion, batez ere partidaren bigarren zatian.
Jaka lizartzarrak bere lehen puntua lortu zuen Zubizarreta III.aren aurka, 22-6 irabaziz. Jakak ondo jokatu zuen, eta Zubizarreta III.ak ez zuen orain arte txapelketan erakutsitakoa azaldu, eta amore eman zuen ligaxkako lehen jardunaldian. Bere aldetik, Peña II.a tolosarrak ezin izan zion aurre egin Lasori, eta 22-16 galdu zuen. Oraindik tartea badu Peña II.ak finalerdietara igarotzeko, eta egindako tanto kopuruak horretan lagundu dezake.
Bigarren jardunaldia ostiralean hasiko da, Tafallan, eta bertan elkarren aurka ariko dira Artola eta Zubizarreta III.a. Larunbatean, Peña II.ak Elordiren aurka jokatuko du Bilboko Bizkaia frontoian, eta Altuna III.a eta Jaka igandean Gasteizko Ogeta pilotalekuan neurtuko dituzte indarrak. Laugarren partida, Laso eta Peio Etxeberriaren artekoa larunbatean jokatuko da, Iruñeko Labrit frontoian.