Gaurko egunez mobilizatzera dei egin du Gernika-Palestina ekimenak gizarteko «hainbat esparrutan». Goizean ikastetxeetan egingo dituzte elkartasun keinuak eta sindikatuei ere luzatu diete deialdia; eguerdian, unibertsitateetan dira egitekoak mobilizazioak; eta arratsaldean, berriz, udalerrietan.
Ekimenaren arabera, Euskal Herrian, guztira, 178 elkarretaratze egingo dira; horietatik 39, Gipuzkoan. Eskualdean ere bat egin dute hainbat ikastetxek, eta arratsaldean elkarretaratzeak egingo dituzte hainbat herritan, horien artean, Asteasun, Amasa-Villabonan eta Tolosan. Kontzentrazioak 19:00etan izango dira, herri bakoitzeko udaletxearen aurrean.