Eskualdean trikitiaren mugimendua indarberritzen jarraitzeko asmoa du Hauspotuz Tolosaldeko Trikiti Elkarteak, eta ildo horretan, ohitura bihurtzen ari den festa eguna antolatu du, hirugarren urtez jarraian. Aurten, urriaren 5ean ospatuko dute Tolosaldeko III. Trikiti Eguna, Tolosan.
11:30ean elkartuko dira Lopez Mendizabal pasealekuan, eta ondoren, kalejira egingo dute herriko kaleetatik. 14:30ak aldera, sorpresaz beteriko bazkaria egingo dute. Egunari amaiera emateko, kalejira erraldoia egingo dute, 18:30ean.
Bazkarirako izena eman nahi dutenek hauspotuztrikitixa@gmail.com helbidera mezua idatzi behar dute, txartelak lortzeko, eta irailaren 27a, ostirala, izango da azken eguna. «Tolosaldeko trikitilaria, pandero jotzailea, trikiti edo pandero ikaslea edo trikiti zalea bazara, animatu egun honetan parte hartzera», adierazi dute elkartetik.