Donostian hasita, lehenengo aldiz, Villabonatik sartuko da Tolosaldera txirrindulari lasterketa. Asteasura joango da, Andazarrate mendatea igotzeko, Zarautz aldera. 100. kilometroa pasata, Tolosaldera berriro ere sartu-irtena egingo du lasterketak. Bigarren pasaeran Bidania-Goiatz aldetik, Urraki jaitsiko dute txirrindulariek. Albiztur pasa eta Tolosara iritsiko dira ondoren 13:30ak aldera. Anoeta pasa eta Alkizara igoko dira orduan lasterkariak. Elbarrena eta Adunako industriagunea pasaz, txirrindulariek Tolosaldea atzean utziko dute. Helmuga Donostian izango da, urtero legez.
Trafiko aldaketak
Biharko proba honek trafiko eragozpenak izango ditu zeharkatzen duen herrietan. Esaterako, Zizurkilen errepideak tropela iritsi baino 45 minutu lehenago itxiko dituzte, eta proba amaitu ostean berriro zabalduko dituzte.
Tolosan, berriz, Rondilla kalea eta San Frantzisko pasealekua itxita egongo dira 12:00etatik aurrera. Udaltzaingoak herritarrei eta bisitariei probaren ibilbide osoan zehar ibilgailuak ez aparkatzeko eskatu die. Horregatik, gaur, 22:00etarako Rondilla kaleko eta San Frantzisko pasealekuko autoak kendu beharko direla jakinarazi dute. Autobus zerbitzuan ere aldaketak egongo dira eta autobus linea ezberdinen geltokiak Santa Klarara lekualdatuko dira lasterketak iraun bitartean.