Gipuzkoako Foru Aldundiak gaur aurkeztu duen LABO GEO programako hiru herri partaideetako bi Altzo eta Larraul izango dira. Irailaren 14ean Larraulen eta hilaren 28an Altzon, arte eta modalitate ezberdinetako dantza ekimenak gauzatuko dituzte. Mutiloak (Goierri) ere izango ditu proiektu horretako beste ikuskizun batzuk.
Larrauli dagokionez, Jarduerak irailaren 14ko larunbatean hasiko dira; mugimendu, ahots eta plastika tailerrekin. 2 ordu eta erdi inguru iraungo dute, eta ikusle guztientzat izango da, dohainik. Irailaren 15ean, igandea, honako ikuskizun hauek egongo dira: NODEren aurkezpena Baturekin, Remedios Vals Jone Amezaga eta Manu Gaigneren eskutik, eta Lehio zikin, zeru garbi ikuskizuna eskainiko du Mari Zaunkak.
Altzon berriz, Irailaren 28an, larunbata; mugimendu, ahots eta plastika tailerrak egingo dira, eta Larraulen moduan, herritar guztientzat irekita egongo da. Irailaren 29an, igandea, DABek Nun Zira? aurkeztuko du, Cielo Rasok Reset emanaldia eta Osa eta Mujikak Bueltaxka ikuskizuna eskainiko dute.
Autobusak udalerrietara joateko
Bertaratzea errazteko, autobus bat jarriko da Donostiako eta Tolosako bisitarientzat, eta aldez aurretik eman beharko da izena.