Lurraldebuserako indarkeria matxistaren aurkako lehen protokoloa hizketagai

Bilera Larraulen izan da eta bertan izan dira Alegiako Regina Sorrarain, Asteasuko Pili Legarra, Larraulgo Maite Arana eta Zizurkilgo Maite Amenabar alkateak. Gipuzkoako Foru Aldundia Lurraldebus zerbitzurako indarkeria matxistaren aurkako lehen protokoloa egiten ari da eta Larraulgoa bigarren bilera izan da, izan ere, joan den astean beste eskualde batzuetako ordezkariekin bildu ziren. Horiek horrela, bilkuraren ondoren aldundiak zabaldutako oharrean, Azahara Dominguez diputatuak azaldu du protokoloaren helburua dela emakumeen segurtasuna bere osotasunean bermatzea: «Helburua da emakumeek garraio publikoan duten segurtasunari osotasunean heltzea, hau da, zerbitzuak berak irauten duen denboran, baina baita horien geralekuetan edo irisgarritasunean dauden bitartean ere, espazio hori guztia indarkeria matxistetatik libre egon dadin». Izan ere, diputatuak esan du emakume askok segurtasun eza autobusetik kanpo izaten dutela, eta horrenbestez autobus geralekuetan azpimarra jarri nahi dutela. «Beharrezkoa da garraio publikoa emakume guzientzako espazio seguru bat izatea, baita igo baino lehen ere. Horretarako, elkarlanean aritu behar dugu udalekin, denon artean emakumeen kontrako indarkeria mota guztiak ezabatzeko pausoak emateko».